أكد الإعلامي أحمد شوبير عبر تغريدة على منصة إكس عن تقدمه ببلاغ رسمي ضد كل من اتهمه أو ربط اسمه بقضية الراحل أحمد رفعت.
وقال شوبير: "تقدمت ببلاغ لوزارة الداخلية إدارة مباحث تكنولوجيا المعلومات والأنترنت برقم 14/ح مباحث الإدارة وجاري التنسيق مع السادة المحامين للتقدم بعدة بلاغات جديدة خلال الساعات المقبلة".
وكان أحمد شوبير قد تحدث صباح اليوم الإثنين في برنامجه الإذاعي مع شوبير على أثير On Sport Fm، أنه سيلجأ للقضاء بعد اتهام البعض له في قضية اللاعب أحمد رفعت.
وقال: "بقالي 48 ساعة عمال أسمع وأرى حواديت وبوستات وقصص عن اتهامي في واقعة الراحل أحمد رفعت.. أنا مش في موضع اتهام عشان أطلع أدافع عن نفسي، بس الإجراءات القانونية لا بد أن تتخذ، فبصراحة كده أنا عمال أجمع وأفلتر كل اللي عمال يتقال ده واللي له حق ياخده والمخطئ يتحاسب".
وكان مصطفى شوبير حارس مرمى الأهلي ونجل الإعلامي أحمد شوبير، رد على ما وصفها اتهامات بدون دليل، بشأن قضية اللاعب الراحل أحمد رفعت.
وتابع: "ولا أخو رفعت ولا وكيله ولا المحامي بتاعه قال حاجة أو ذكر حتى أسم أحمد شوبير زي ما المفبركين بيكتبوا!!".
وأضاف: "التريند والاتهامات الباطلة بيعموا الناس، أي حد بيكتب أي حاجة والناس للأسف بتصدقها وخلاص.. ياريت الناس اللي بتكتب ده درس لينا تبدأ بنفسها الأول ومتظلمش حد تاني بإتهامات باطلة بدون أي دليل لأن كده أنت أول واحد متعلمش من اللي حصل وبتكرر الظلم بس بطريقة تانية.. استقيموا يرحمكم الله.. وسيبكم من التريند كلنا لله راجعون.. أخيراً ربنا يرحمك يا رفعت أكيد إنت في مكان أحسن، لا تنسوه من صالح دعائكم".
وكتب مصطفى شوبير تغريدة عبر حسابه على إكس: "اتهامات اتهامات وخوض في ذمم بدون علم ولا أي دليل، إنتوا مفرقتوش عن اللي ظلموا رفعت في حاجة، ودلوقتي بتتهموا ناس ظلماً بأذي شخص بدون أي دليل، حتى دي عايزانها أهلي وزمالك وتريند.. شقيق اللاعب طلع وقال اسألوا فلان وذکر اسم شخص، ووكيله كان قاعد وحصلت مواجهه بينه وبين الشخص اللي تم ذكر اسمه.. فين بقى اسم أحمد شوبير في جملة مفيدة ؟".